Stuðul til mentanarsøgulig skip

Fyri at fáa átekning sum mentanarsøguligt skip, skulu hesi krøv vera uppfylt:

·  Skipið skal vera heimahoyrandi í Føroyum.

·  Skipið skal umboða eitt søguligt tíðarskeið í føroysku skipasøguni.

·  Skipið skal hava serligan mentanarsøguligan týdning fyri Føroyar. Meting um mentanarsøguliga týdningin verður gjørd av antikvariska myndugleikanum.

·  Skipið skal vera millum 5 og 300 BT.

·  Skipið vera eldri enn 50 ár.

·  Ánarin skal søkja og skrivliga vátta, at skipið kann verða varðveitt sum varandi mentanarminni, og at varðveitandi átøk, viðlíkahald og møgulig umvælingararbeiði verða gjørd eftir antikvariskum grundreglum, sum varða av søguligu dygdunum hjá skipinum.

Málsgongd í sambandi við átekning

1.    Umsókn um átekning

2.    Støðutakan til umsókn

3.    Verndarætlan

4.    Endurskoðan av átekning

Viðv. 1. Umsókn um átekning

Umsókn um átekning sum mentanarsøguligt skip skal fevna um

·  støðulýsing av skipinum

·  skjalprógv og skjalatilfar um skipið

·  lýsing av søguliga týdninginum hjá skipinum

·  lýsing av, hvussu ekta og eftirfarandi skipið er varðveitt

Við umsóknini váttar umsøkjarin, at hann ynskir at varðveita skipið sum varandi mentanarminni, og at varðveitandi átøk, viðlíkahald og møgulig umvælingararbeiði fara at verða gjørd eftir antikvariskum grundreglum, sum varða av søguligu dygdunum hjá skipinum.

Ófullfíggjaðar umsóknir verða ikki viðgjørdar, men sendar aftur við fráboðan um hetta og at hon eigur at verða útgreinað. Tá ein umsókn er góðkend, verður fyribils svar sent við fráboðan um, at hon verður tikin til viðgerðar og nær svar kann væntast.

Viðv. 2. Støðutakan til umsókn

Spurningurin um mentanarsøguligt virði snýr seg um eina heildarmeting í hvørjum einstøkum føri. Viðkomandi í metingini er, hvørjar umvælingarætlanir fyriliggja og hvørjar møguleikar eigarin hevur at miðla kunnleika um siðbundnan sjómansskap og siðbundin maritim handverk.

Antikvariski myndugleikin metir um umsóknina við støði í leiðreglum um, hvørji viðurskifti eiga at verða havd í huga, tá mett verður um tað mentanarsøguliga virðið hjá skipinum.

Les eisini: Leiðreglur í sambandi við meting og tilmæli um tilnevning av skipi sum mentanarsøguligt skip.

Um antikvariski myndugleikin metir, at skipið ikki uppfyllir krøvini fyri átekning sum mentanarsøguligt skip á nøktandi hátt, fær ánarin fráboðan um,

·  at tilgongdin í sambandi við átekning og stuðul sambært kunngerð nr. 107 frá 13. august 2013 ikki heldur fram.

·  at avgerðin kann kærast til landsstýrismannin innan 4 vikur.

·  Umsøkjarin fær eisini avrit av metingartilfarinum hjá antikvariska myndugleikanum.

Um antikvariski myndugleikin metir, at skipið uppfyllir krøvini nøktandi fyri átekning á nøktandi hátt, fær ánarin fráboðan um,

·  at tilgongdin í sambandi við átekning og stuðul sambært kunngerð nr. 107 frá 13. august 2013 heldur fram,

·  at farið verður undir at gera eina verndarætlan fyri skipið, og

·  nær farið verður undir at gera nevndu verndarætlan og hvussu verður farið fram.

·  Umsøkjarin fær eisini avrit av metingartilfarinum hjá antikvariska myndugleikanum.

Viðv. 3. Verndarætlan

Verndarætlanin skal lýsa, hvussu ætlanin er at varðveita skipið sum mentanarminni. Við støði í gjølligari støðumeting skal ætlanin greina ítøkiliga, hvussu varðveitingararbeiðið skal fara fram, og hvussu varðveitandi átøk, viðlíkahald og møgulig umvælingararbeiði verða gjørd, harundir tíðarætlan og kostnaðarmeting.

Meðan umsókn um átekning er til viðgerðar og verndarætlan verður gjørd, mugu broytingar á skipinum bert verða gjørdar eftir avtalu við antikvariska myndugleikan. Verndarætlanin verður gjørd fyri umleið 7 ár.

Skip, sum eru undir ný- ella umbygging, kunnu fáa eina undangóðkenning sum mentanarsøgulig skip, um eigarin framman undan hevur sent antikvariska myndugleikanum eina verkætlanarlýsing til góðkenningar.

Um krøv og treytir í sambandi við átekning ikki verða hildnar, kann antikvariski myndugleikin taka átekningina aftur.

Viðv. 4. Endurskoðan av átekning

Ein átekning sum mentanarsøguligt skip verður endurskoðað 7. hvørt ár. 

Átekning, sum er givin áðrenn 2013, er galdandi í 7 ár frá tí degi, ið skipið fyrstu ferð søkir um stuðul. Sí yvirlit yvir skip við átekning, sum er givin áðrenn 2013, her.

Avgerð, ið er tikin av antikvariska myndugleikanum, kann sambært løgtingslóg um mentanarsøgulig skip kærast til landsstýrismannin. Kærufreistin er 4 vikur eftir, at kærarin hevur móttikið avgerðina.

Skip, sum hava átekning sum mentanarsøgulig skip, kunnu søkja um stuðul til umvælingarverkætlanir og til rakstrarútreiðslur fyri at halda skipið siglandi.

Skip, sum ikki hava átekning, kunnu ikki søkja um stuðul.

Umvælingarstuðul verður søktur við at senda inn umsókn við nágreiniligari verkætlanarlýsing.

Søkt kann verða um stuðul til umvælingarverkætlanir, harundir

·  Skrokkumvælingar, kalfatring, útskifting av plankum, kjøli, barlast, bondum, knøum, róðri og líknandi.

·  Dekk, stúttur, bjálkar, karmar, kappar, lúkur, lúnning, garnering, ruff og dekshús.

·  At afturføra dokumenteraða innrætting, hús og stýrhús, salong, messu og maskinrúm.

·  Mastur, rundholt, rigning, besløg og segl.

·  Høvuðsmotorur ella ljósmotorur, endurnýggjan av varðveitingarverdum ella originalum motori og skrúvu.

Umvælingarstuðul verður ikki veittur til nútímansgerð av upprunaligari ella varðveittari innrætting.

Stuðulin til umvælingar er í mesta lagi 60 % av útreiðslunum.

Rakstrarstuðul verður søktur við at senda inn grannskoðana roknskap fyri árið fyri.

Søkt kann verða um stuðul til árligt viðlíkahald og annnan rakstrarkostnað fyri at halda skipið siglandi, harundir:

·  Uppháling, so sum botnviðgerð, aksultrekk, máling, zink o.a.

·  Umvælingar, sum antikvariski myndugleikin metir vera bráðfeingis.

·  Reingerð og máling omandekks.

·  Motorrúm, so sum eykalutir, olja, filtur, feitt, reingerð og máling.

·  Aksultrekk.

·  Sýn av kravdari trygdarútgerð, so sum bjargingarbátar, medisinkista, vestar, neyðbluss og rakettir.

·  Eftirlit av radioútgerð, alarmum, oljufýring og øðrum.

·  Olja og landstreymur við bryggju um veturin.

·  Tryggingargjøld, som sum skrokktrygging og hjálparfólkatrygging.

·  Grannskoðan og bókhald.

Rakstrarstuðul er í mesta lagi 40 % av útreiðslunum, sum sambært seinast grannskoðaða roknskapi varð nýttur til nevndu endamál. Hesi endamál eiga eisini at framganga av roknskapinum. 

Stuðulsmóttakari skal lata inn roknskap í seinasta lagi 1. mars árið eftir játtanarárið. Henda áseting er eisini treyt fyri nýggjari tilsøgn um stuðul.

Fíggjarætlan og nýggj tilsøgn um stuðul skal somuleiðis verða Tjóðsavninum í hendi seinasta lagi 1. mars