Lendisbati er ein verkætlan hjá Tjóðsavninum, ið fremur náttúruendurbøtandi átøk í Føroyum. Høvuðsátøkini vera m.a. at fyribyrgja jarðrivi, bøta um lívmargfeldið og endurbøta mó- og vátlendir til frama fyri kolevnisupptøku.

Føroyska náttúran er viðbrekin. Leivdir av torvskurði síggjast sum sár í lendinum, og jarðriv eru ein vanlig sjón. Harðbalna veðurlagið ger somuleiðis, at lendið er undir áhaldandi trýsti. Hóast vit menniskju altíð hava verið sera tengd at náttúruni, hava vit ikki altíð sýnt virðing og havt fyrilit fyri, hvat náttúrutilfeingið tolir. Djóra- og plantulív eru í vanda, tí menniskjaliga virksemið ofta ikki tekur atlit til náttúruna. Eisini eru veðurlagsbroytingar eitt varandi fyribrigdi, og trýstið á náttúruna hevur tí ongantíð verið størri, enn tað er nú. Endamálið við átøkunum hjá Lendisbata er at bøta um hesi náttúruviðurskifti. Átøkini hjá Lendisbata eru eitt tilboð til óðals- og festibøndur og aðrar jarðareigarar, sum sjálvbodnir leggja lendi til átøkini. Øll átøk verða gjørd í tøttum samstarvi við jarðareigararnar og -leigarar, sum kenna øki síni best og tí koma við góðum ráðum, og í fleiri førum luttaka beinleiðis í arbeiðinum.

Átøkini verða fíggjað uttanífrá, men Tjóðsavnið umsitur hetta uttan kostnað. Hetta merkir, at allur stuðul fer beinleiðis til átøkini.