Náttúrufriðøkið Stóriryggur
Mynd: Fv. Jógvan Sofus Vilhelmsen, Kristin Vilhelmsen og Poul Juul Vilhelmsen
Tað var í 2020, at eigararnir av hagapartinum Stóriryggur við Kristin Vilhelmsen á odda avgjørdu at taka seyðin av. Stóriryggur er nú eitt náttúrufriðøki, har gróður og fuglalív sleppa at koma fyri seg uttan ávirkan frá menniskjaligum virksemi.
Kristin Vilhelmsen hevur leingi haft ein dreym um at síggja sín hagapart seyðafríðan. Áhugin fyri náttúruni hevur altíð ligið honum nær, og hann vil fegin síggja aftur ríka fuglalívið á Kalsoynnni, ið hann minnist sum unglingi. Uttan seyðin fer gróðurin at blíva heilt øðrvísi og síðari. Hetta metir Kristin fer at ríka um fuglalívið.
Hagaparturin Stóriryggur er ognarjørð sunnarlaga á Kalsoynni, og er í løtuni størsta náttúrufriðøki í Føroyum. Umleið 500.000 m2 av haga koma nú fríu náttúruni í Føroyum til gagns. Aage V. Jensens fonde hevur stuðlað verkætlanini í Stóraryggi.
Mynd: Hegnað verður í góðveðrinum
Samstarv við granskingarstovnar
Í august mánaði vóru granskarar frá norska granskingarstovninum NIBIO í Føroyum í samband við, at plantufrøðiligar kanningar skuldu gerast á Stóraryggi. Lendisbati, ið er ein verkætlan hjá Tjóðsavninum, fremur kanningar saman við NIBIO, ið hevur servitan á økinum, fyri soleiðis at økja um vitanina um lendið og plantuvøksturin á Stóriryggi í Kalsoy. Framyvir verða vakstrar- og plantufrøðiligu kanningarnar endurtiknar við jøvnum millumbilum, soleiðis at til ber at fylgja við, hvussu hagin við tíðini mennist, eftir at seyðurin var tikin av. Samstarvið við NIBIO er partur av eini verkætlan hjá Lendisbata og stuðlað av norðurlendska ráðharraráðnum.
Mynd: Hagaparturin Stóriryggur sæddur frá Klakki á Borðoynni
Lendisbati samstarvar við jarðareigarar og festarar
Endamálið hjá Lendisbata er at fremja náttúruendurbøtandi átøk. Høvuðsátøkini eru m.a. at fyribyrgja og bøta um jarðriv, vaksa um lívmargfeldið og endurbøta mó- og vátlendir til frama fyri djóralív og kolevnisupptøku. Hetta krevur nógvar hendur. Lendisbati samstarvar tí við jarðareigarar og festarar kring alt landið, sum hjálpa við at bøta um lívmargfeldið og at endurbøta náttúruna til frama fyri náttúru og landbúnað og til gleði fyri okkum menniskju. Verkætlanirnar fevna m.a. um náttúrufriðøkið Stóraryggur, endurbøting av skriðu omanfyri Syðradalsbygd á Kalsoynni og skipan av náttúrufriðøki í Sundshaga á Streymoynni.
SAMBAND
